Ակադեմիական փոխճանաչման և շարժունության ազգային տեղեկատվական կենտրոնի կողմից ՀՀ բուհերի համար կազմակերպած ամենամյա դասընթացը տեղի ունեցավ սույն թվականի դեկտեմբերի 5-ին` «Փախստականների որակավորումների ճանաչումը. Փախստականների եվրոպական որակավորումների անձնագիրը» թեմայով:
Դասընթացի նպատակն էր խթանել «Բարձրագույն կրթության և գիտության մասին» Հայաստանի Հանրապետության օրենքի 20-րդ հոդվածի արդյունավետ կիրարկումը` նպաստելով բարձրագույն ուսումնական հաստատություններում փախստականների որակավորումների ճանաչման հետ կապված հիմնախնդիրների վերաբերյալ տեղեկացվածության բարձրացմանը, ինչպես նաև բուհերի ներկայացուցիչներին ծանոթացնել Փախստականների Եվրոպական որակավորման անձնագրի շնորհման ընթացակարգին:
Դասընթացին մասնակցում էին 17 բուհերի 22 ներկայացուցիչներ: Դասընթացը բաղկացած էր տեսական և գործնական մասերից:
Դասընթացի տեսական մասում ԱՓՇԱՏԿ-ի գնահատման մասնագետները ներկայացրեցին Լիսաբոնի ճանաչման կոնվենցիայի 7-րդ հոդվածը, դրա նախադրյալները և 7-րդ հոդվածի հանձնարարականը: Բուհի ներկայացուցիչները ծանոթացան փախստականների որակավորումների ճանաչման գործընթացին, կիրառվող մեթոդաբանությանը, ինչպես նաև փախստականների որակավորումների ճանաչման ազգային և միջազգային փորձին: Մասնավորապես, մանրամասն ներկայացվեց փախստականների որակավորումների ճանաչման միջազգային լավագույն փորձը` Եվրոպայի խորհրդի «Փախստականների եվրոպական որակավորումների անձնագիրը» ծրագիրը, դրա ընթացակարգը և ձեռքբերումները:
Դասընթացի երկրորդ մասում մասնակիցները հնարավորություն ունեցան իրականացնել որակավորումների գնահատում իրական օրինակների վրա` քննարկելով իրենց բուհերում հանդիպած խնդիրները:
