Year: 2022

Հարավարևելյան Նորվեգիայի համալսարանը (USN – University of South-Eastern Norway) անդրադարձել է «Բուհ ընդունելության և որակավորումների ճանաչման վերաբերյալ հայ-նորվեգական համագործակցություն» (NACAR) ծրագրին, որի ամփոփիչ համաժողովը կայացավ 2022թ. մայիսի 13-ին Վ. Բրյուսովի անվան պետական համալսարանում:
NACAR ծրագիրը ֆինանսավորվել է Նորվեգիայի կառավարության և Կրթության միջազգային համագործակցության նորվեգական գործակալության (HK-dir) կողմից: Ծրագրի հայաստանյան գործընկերներն են Ակադեմիական փոխճանաչման և շարժունության ազգային տեղեկատվական կենտրոնը (ԱՓՇԱՏԿ), Վ. Բրյուսովի անվան պետական համալսարանը (ԲՊՀ) և Երևանի Մ. Հերացու անվան պետական բժշկական համալսարանը, իսկ նորվեգական կողմից`Կրթության որակի ապահովման նորվեգական գործակալությունը (NOKUT) և Հարավարևելյան Նորվեգիայի համալսարանը (USN – University of South-Eastern Norway):
NACAR ծրագրի նպատակն է Հայաստանում և Նորվեգիայում ակադեմիական ներուժի զարգացումը և երկու երկրների բուհերի միջև համագործակցության խթանումը`օտարերկրյա ուսանողների ընդունելության և ճանաչման ինստիտուցիոնալ թափանցիկ չափանիշների և ընթացակարգերի կիրարկմամբ: Ծրագիրն ուղղված է որակավորումների ճանաչման ինստիտուցիոնալ ընթացակարգերի մշակմանը:
Ծանոթացե՛ք հրապարակմանը և տեսանյութին հետևյալ հղումով https://tinyurl.com/USNNACAR

2022թ. ապրիլի 28-ին Ռիգայում «QUATREC 2 – համեմատելով որակավորումները հուսալի ճանաչման համար» ծրագրի շրջանակում տեղի ունեցավ փորձի փոխանակման հերթական հանդիպումը: Ակադեմիական փոխճանաչման և շարժունության ազգային տեղեկատվական կենտրոնի կողմից հանդիպմանը մասնակցեցին երկու գնահատման մասնագետներ:

Ծրագրի նպատակն է բուհերի և գործատուների համար դյուրացնել որակավորումների գնահատման գործընթացում ուսումնառության արդյունքների արդյունավետ օգտագործումը` նպաստելով որակավորումների արդար ճանաչմանը:

Հանդիպման ժամանակ ներկայացվեցին ծրագրի համեմատական արդյունքները, ինչպես նաև որակավորումների գնահատման գործընթացում ուսումնառության արդյունքների գործածման լիտվական և անգլիական փորձը:

QUATREC 2 ծրագրի շրջանակում փորձի փոխանակման հաջորդ հանդիպումը տեղի կունենա մայիսի 25-ին Երևանում:

2018 թվականի սեպտեմբերին սկսված «Բուհ ընդունելության և որակավորումների ճանաչման վերաբերյալ հայ-նորվեգական համագործակցություն» (NACAR) ծրագիրը մոտեցավ իր ավարտական փուլին: Ծրագրի հիմնական նպատակն էր խթանել հայկական և նորվեգական բուհերի միջև համագործակցությունը հատկապես  ճանաչման  հարցերում:  NACAR-ի շրջանակներում ս.թ. ապրիլի 19-22-ը տեղի ունեցավ ևս մեկ այց Օսլո, Նորվեգիա` քննարկելու համագործակցության նոր հնարավորությունները, ինչպես նաև Երևանում մայիսին կազմակերպվող ավարտական համաժողովը:

ԱՓՇԱՏԿ-ի կողմից այցին մասնակցեցին չորս գնահատման մասնագետներ:  Նորվեգական գործընկերները այցի օրակարգը նախապատրաստել էին հայկական գործընկերների ցանկություններին համապատասխան` նախատեսելով հանդիպումներ ինչպես Կրթության որակի ապահովման նորվեգական գործակալությունում (NOKUT), այնպես էլ Հարավարևելյան Նորվեգիայի համալսարանի համալսարանում (USN – University of South-Eastern Norway) համապատսխան բաժինների հետ:  Ճանաչման համատեքստում մեծ հետաքրքրությամբ քննարկվեցին վերջերս ներդրված և  գործարկված  նորվեգական դիպլոմների թվային գրանցամատյանը և ճանաչման ներքին ռեգիստրը: Մասնակիցները նաև ծանոթացան օտարերկրյա որակավորումների ճանաչման ոլորտի ազգային զարգացումներին և հատկապես ավտոմատ ճանաչման մեխանիզմներին:

Հարավարևելյան Նորվեգիայի գործընկերները ներկայացրեցին իրենց հաստատությունները և կրթական ծրագրերը:  Այնուհետև Վ. Բրյուսովի անվան պետական համալսարանը և Երևանի Մ. Հերացու անվան պետական բժշկական համալսարանի ներկայացուցիչները  երկկողմ հանդիպումներ ունեցան՝ քննարկելու հետագա համագործակցության հնարավորությունները:

Ս.թ. մարտի 30-ից ապրիլի 1-ը ԱՓՇԱՏԿ-ի տնօրեն Գայանե Հարությունյանը և բարձրագույն կրթության մասնագետ Անի Հովհաննիսյանն անցկացրեցին ուսումնառության վերջնարդյունքների բենչմարքինգի վերաբերյալ եռօրյա վերապատրաստում Հայաստանի ազգային ագրարային համալսարանի (ՀԱԱՀ) մասնագետների համար: ՀԱԱՀ-ի առաջարկով ` որպես օրինակ ուսումնասիրվել և UNESCO World Reference Levels թվային գործիքով վերլուծվել էին  բուհի մեկ բակալավրական և մեկ մագիստրոսական կրթական ծրագրեր, ինչպես նաև  ՀՀ գյուղատնտեսության որակավորումների ոլորտային շրջանակը: Ավելին, բակալավրական կրթական ծրագիրը թվային գործիքի միջոցով համեմատվել էր նաև ՀԱԱՀ-ի միջագային գործընկեր համալսարանի նմանատիպ որակավորում շնորհող բակալավրական կրթական ծրագրի հետ:

Վերապատրաստումն ինրտերակտիվ էր՝ ներառելով խմբային աշխատանքներ և ներկայացված մեթոդաբանության անմիջական կիրառում:

Մայիսի 25-ին Quatrec-2 ծրագրի շրջանակներում տեղի կունենա սեմինար «Ուսումնառության վերջնարդյունքների կիրառումը որակավորումների գնահատումը խթանելու համար. առաջարկություններ» թեմայով:

Միջոցառմանը մասնակցելու համար խնդրում ենք գրանցվել այստեղ մինչև մայիսի 15-ը:

Երևանի պետական համալսարանի (ԵՊՀ) Գիտական խորհրդի նիստերի դահլիճում տեղի է ունեցել «Օտարերկրյա որակավորումների ճանաչումը` որպես բուհերի միջազգայնացման և շարժունության հիմնաքար» թեմայով աշխատաժողով՝ պետական համալսարանների ռեկտորների, միջազգային կապերի գծով պրոռեկտորների և աշխատակիցների մասնակցությամբ:

Քննարկվող թեմայի ընտրությունը պայմանավորված էր այն հանգամանքով, որ 2021 թ. ուժի մեջ է մտել ասիական և խաղաղօվկիանորսյան տարածաշրջանում բարձրագույն որակավորումների փոխճանաչման Տոկիոյի կոնվենցիան, իսկ նոյոմբերի 16-ին ՀՀ Ազգային ժողովի կողմից միաձայն հավանության է արժանացել ՀՀ կառավարության հեղինակած ««Բարձրագույն կրթության որակավորումների փոխճանաչման մասին» համաշխարհային կոնվենցիան վավերացնելու մասին» օրենքի նախագիծը: Բոլոր երեք կոնվենցիաները (Հայաստանը դեռ 2005 թվականին միացել էր եվրոպական տարածաշրջանում Բարձրագույն կրթության որակավորումների փոխճանաչման Լիսաբոնի կոնվենցիային) ունեն ռազմավարական նշանակություն և խթանում են ՀՀ որակավորումների ճանաչումը աշխարhի տարբեր տարածաշրջաններում, ակադեմիական և մասնագիտական շարժունությունը:

Նիստի ընթացքում Ակադեմիական փոխճանաչման և շարժունության ազգային տեղեկատվական կենտրոնի (ԱՓՇԱՏԿ) տնօրեն Գ. Հարությունյանը և բարձրագույն կրթության փորձագետ Ա. Հովհաննիսյանը ներկայացրել են կենտրոնի գործունեությունը, մասնավորապես ՀՀ բուհերի կողմից իրականացվող օտարերկրյա որակավորումների և կարճաժամկետ ուսուցման/կրեդիտային շարժունության ճանաչման մասին հետազոտությունը: Հարցուպատասխանի և շահագրգիռ քննարկման միջոցով ներկայացվել են օտարերկրյա որակավորումների ճանաչման ընթացակարգերը, այդ գործընթացում ԱՓՇԱՏԿ–ի կողմից մատուցվող ծառայությունները:

Նիստին ներկա էին ՀՀ բուհերից շուրջ 40 մասնակից՝ ներառյալ 12 ռեկտոր, ռեկտորի տեղակալներ և միջազգային բաժինների ներկայացուցիչներ: ԱՓՇԱՏԿ-ի կողմից իրականացված հետազոտության արդյունքների ներկայացումից հետո տեղի է ունեցել քննարկում ճանաչման գործընթացում առկա խնդիրների, օրենսդրական բարեփոխումների անհրաժեշտության և գործող ընթացակարգերի վերանայման վերաբերյալ:

Ակադեմիական փոխճանաչման և շարժունության ազգային տեղեկատվական կենտրոնի նոր հասցեն է Վրացյան 73:

Ավանդույթի համաձայն դեկտեմբերի 23-ին տեղի ունեցավ ԱՓՇԱՏԿ-ի  վերապատրաստման դասընթացը` <<Օտարերկրյա որակավորումների ճանաչման արդի հիմնախնդիրները.  ապագային ընդառաջ>>  խորագրով:  Միջոցառմանը մասնակցում էին 23 բուհերի 38 ներկայացուցիչներ:

Որակավորումների ճանաչման համար 2021թ․հատկանշական տարի էր, քանի որ մայիսի 1-ից ուժի մեջ մտավ Տոկիոյի կոնվենցիան, և նոյեմբեր ամսին ՀՀ Ազգային ժողովը միաձայն հավանության արժանացրեց «Բարձրագույն կրթության որակավորումների փոխճանաչման մասին» գլոբալ կոնվենցիան վավերացնելու մասին օրենքի նախագիծը:

Դասընթացը բաղկացած էր երկու մասից: Առաջին մասում ներկայացվեց ճանաչման ռազմավարական նշանակությունը և կրթական համակարգերի բազմազանությունը, ճանաչման հիմնական սկզբունքները և չափանիշները: Դասընթացի երկրորդ մասը անցկացվեց Միջազգային կրթության ամերիկյան խորհուրդներ կազմակերպության հետ համատեղ և ներկայացվեց ԱՄՆ  բարձրագույն կրթության համակարգը և շնորհվող որակավորումները:  Մանրամասն խոսվեց համայնքային քոլեջների համակարգի մասին:  Դասընթացի ընթացքում ներկայացվեց մեծ թվով օրինականեր  և մասնակիցները հնարավորություն ունեցան ինքնուրույն կերպով գնահատել տարբեր որակակավորումներ: Միջազգային կրթության ամերիկյան խորհուրդների ներկկայացուցիչը փոքր անակնկալ նվերներ էր պատրաստել  մասնակիցների համար:   Դասընթացի վերջում մասնակիցներին հանձնվեցին վկայականեր: